«Ливерпуль» «Бавария» томонидан қизиқиш бўлаётганига қарамай, ярим ҳимоячи Флориан Вирц билан муддатидан олдин хайрлашишни режалаштирмаяпти. Бу ҳақда Football365 хабар берди.

Вирц 2025 йил ёзида «Байер»дан тахминан 116 миллион фунт стерлинг эвазига инглиз клубига ўтган эди. Бироқ унинг ҳозирги ўйини кутилган даражада эмас. «Бавария» 23 ёшли футболчига жиддий қизиқиш билдирмоқда ва унинг трансфери бўйича янги таклиф билан чиқиш имкониятини кўриб чиқяпти.

Шунга қарамай, манба маълумотига кўра, «Ливерпуль» Вирцга ишончини сақлаб қолмоқда ва вақт ўтиши билан у трансфери учун сарфланган катта маблағни оқлашига умид қиляпти. Бош мураббий Андони Ираола ҳам немис футболчисига ўзини кўрсатиш учун имконият беришда давом этиш ниятида.