Daily Mail нашри хабарига кўра, «Манчестер Юнайтед»нинг ёш футболчиси Харри Амасс узоқ вақтдан бери ҳамкорлик қилиб келган агенти Жейсон Мак билан муносабатларни якунлаб, M+C Saatchi Football агентлигига қўшилди.
19 ёшли футболчи ёзги трансфер ойнасида «Олд Траффорд»ни тарк эта олмади. Бунда «Манчестер Юнайтед»нинг «Ньюкасл Юнайтед» чап қанот ҳимоячиси Льюис Холлни харид қила олмагани ҳам қарорга таъсир кўрсатган.
Шунингдек, Амасс жамоани бутунлай тарк этиши ёки ижара асосида бошқа клубга ўтиши масаласида ҳам ноаниқлик бўлган. «Бернли» эса уни ўз сафига қўшиб олиш бўйича музокара олиб борган клублардан бири эди.
Амасс август ойида янги агентлик билан ҳамкорликни бошлади. Бироқ бу келишув узоққа чўзилмаслиги ҳам мумкин. Хабарларга кўра, бир неча агент футболчи ва унинг оиласини вакилликни яна ўзгартиришга кўндиришга ҳаракат қилмоқда.
Чап қанот ҳимоячисига январь трансфер ойнаси арафасидаёқ қизиқиш ортган. Чемпионшип, Германия ва Нидерландия клублари унинг вазиятини кузатиб бормоқда.
«Манчестер Юнайтед»да табиий чап қанот ҳимоячиси етишмаётганига қарамай, Амасс жорий мавсумда етарлича имкониятга эга бўлмади. Майкл Каррик ҳозиргача бу позицияда Люк Шоу, Патрик Доргу ва Нуссаир Мазрауини афзал кўрмоқда.
«Олд Траффорд»да асосий жамоада мунтазам ўйин амалиётига эга бўлиш қийин бўлиб турган бир пайтда, тўғри агентлик билан ҳамкорлик қилиш Амасснинг январда бошқа клубга ўтишида муҳим аҳамият касб этиши мумкин. Ҳозирча унинг ижара асосида кетиши энг эҳтимолий вариант сифатида қаралмоқда.
