«Рома»нинг собиқ сардори ва афсонаси Франческо Тотти Пауло Дибаланинг 2022 йил ёзида Рим клубига ўтиши билан боғлиқ тафсилотларни ёдга олди. Италиялик собиқ футболчи ўзининг «Oltre» номли автобиографик китобида жамоа раҳбарияти уни аргентиналик футболчининг тақдимотига ва унга афсонавий 10-рақамли либосни топшириш маросимига жалб қилмоқчи бўлганини сўзлаб берди.

«Пауло Римга келганида, клуб воситачилар орқали менга хабар юборди. Улар унга ўнликни топширмоқчи эди ва Квадрат Колизейдаги расмий тақдимот пайтида уни айнан мен топширишимни хоҳлашганди. Менинг жавобим кескин бўлди: «Ақлдан озганмисизлар?». Агар жасоратингиз етса — ўзингиз беринг. Футболчига қарши ҳеч қандай адоватим йўқ, у менга ҳам футболчи, ҳам инсон сифатида жуда ёқади. Лекин мен: «Агар шундай ниятингиз бўлса — мени аралаштирмасдан ўзингиз қилинг», деб жавоб бердим.

Жуда аниқ айтмоқчиман: мен 10-рақамли либосни ҳеч қачон муомаладан бутунлай чиқариб ташламаган бўлардим, чунки бу болаларни ажойиб орзудан маҳрум қилиш билан тенг. Ҳар куни янги Тотти пайдо бўлишига умид қиламан — Римда туғилган, Римда улғайган ва бутун умри учун «Рома»ни танлаган инсон. Дунёнинг бошқа чеккасидан келадиган, қисқа муддат қолиб, кейин кетадиган одамга бу либосни бериш эса бошқа масала. Бу жуда муҳим ва рамзий рақам бўлиб, уни фақат «Рома»да 15 ёки 20 йил ўтказиш салоҳиятига эга бўлган инсонгагина топшириш керак», — дейди Тотти. Унинг сўзларини La Gazzetta dello Sport келтирмоқда.

А Сериянинг жорий мавсумида Дибала ҳисобида бешта ўйинда тўртта голли узатма бор.