«Roma»ning sobiq sardori va afsonasi Franchesko Totti Paulo Dibalaning 2022 yil yozida Rim klubiga o‘tishi bilan bog‘liq tafsilotlarni yodga oldi. Italiyalik sobiq futbolchi o‘zining «Oltre» nomli avtobiografik kitobida jamoa rahbariyati uni argentinalik futbolchining taqdimotiga va unga afsonaviy 10-raqamli libosni topshirish marosimiga jalb qilmoqchi bo‘lganini so‘zlab berdi.

«Paulo Rimga kelganida, klub vositachilar orqali menga xabar yubordi. Ular unga o‘nlikni topshirmoqchi edi va Kvadrat Kolizeydagi rasmiy taqdimot paytida uni aynan men topshirishimni xohlashgandi. Mening javobim keskin bo‘ldi: «Aqldan ozganmisizlar?». Agar jasoratingiz yetsa — o‘zingiz bering. Futbolchiga qarshi hech qanday adovatim yo‘q, u menga ham futbolchi, ham inson sifatida juda yoqadi. Lekin men: «Agar shunday niyatingiz bo‘lsa — meni aralashtirmasdan o‘zingiz qiling», deb javob berdim.

Juda aniq aytmoqchiman: men 10-raqamli libosni hech qachon muomaladan butunlay chiqarib tashlamagan bo‘lardim, chunki bu bolalarni ajoyib orzudan mahrum qilish bilan teng. Har kuni yangi Totti paydo bo‘lishiga umid qilaman — Rimda tug‘ilgan, Rimda ulg‘aygan va butun umri uchun «Roma»ni tanlagan inson. Dunyoning boshqa chekkasidan keladigan, qisqa muddat qolib, keyin ketadigan odamga bu libosni berish esa boshqa masala. Bu juda muhim va ramziy raqam bo‘lib, uni faqat «Roma»da 15 yoki 20 yil o‘tkazish salohiyatiga ega bo‘lgan insongagina topshirish kerak», — deydi Totti. Uning so‘zlarini La Gazzetta dello Sport keltirmoqda.

A Seriyaning joriy mavsumida Dibala hisobida beshta o‘yinda to‘rtta golli uzatma bor.