Испания терма жамоаси бош мураббийи Луис де ла Фуэнте Ламин Ямалнинг кибрли экани ҳақидаги гапларга муносабат билдирди.

"Одамлар ҳақиқий Ламин Ямални билмайди. У жуда яхши жамоавий футболчи, ишончли шерик ва у билан ишлаш жуда осон", — деди де ла Фуэнте The Athletic нашрига берган интервьюсида.

Мураббий "эго" сўзига нега доим салбий маъно юкланишини тушунмаслигини ҳам таъкидлади.

"Ҳаммамизда эго бор. Агар амбицияни жамоанинг умумий мақсади сари йўналтира олсанг, бу жуда яхши сифат", — деди у.

Мутахассиснинг айтишича, Жаҳон чемпионати Ямалга катта фойда берган. У футболчи, жамоадош ва инсон сифатида янада ўсган.

"Энди у ҳатто ёрқин ўйин кўрсатмаётган бўлса ҳам, жамоага фойда келтира олишини билади. Бу унинг ривожланишида жуда муҳим қадам. Унинг олдида ҳали кўп иш бор. Ламинда узоқ йиллар давомида жаҳон даражасидаги футболчи бўлиб қолиш учун барча зарур сифатлар бор", — деди де ла Фуэнте.

Де ла Фуэнте Ямални Испания миллий терма жамоасига биринчи марта 2023 йил сентябрда чақирган эди.

Грузияга қарши дебют учрашувида 16 ёшли Ямал гол урди ва Испания терма жамоаси тарихидаги энг ёш дебютант ҳамда энг ёш гол муаллифига айланди.