Ирландия терма жамоаси ва "Манчестер Юнайтед"нинг собиқ футболчиси Рой Кин мураббийлик фаолиятига қайтиш эҳтимолини истисно қилмади. Сўнгги пайтларда у "Селтик" бош мураббийи бўлиши мумкинлиги ҳақида хабарлар тарқалмоқда.
Кин яқинда "Селтик Парк" стадионида "Селтик" ва "Рейнджерс" ўртасидаги ўйинни трибунадан кузатган. Учрашув мезбонларнинг мағлубияти билан якунланган.
Sky Sports эфирида Мика Ричардс билан суҳбатда Кин баъзан мураббийликка қайтиш ҳақида ўйлаб қолишини тан олди.
"Баъзан дам олиш кунлари ўйинларни кўриб, айрим жамоаларга қараб: "Бу ерга бориб, яхши ишлай олардим", деб ўйлайман.
Лекин бу фикрлар асосан дам олиш кунлари келади. Ҳафта ичида эмас. Душанба куни эрталаб маҳаллий кафеда тухум еб, газета ўқиб ўтирганимда ва автомагистралларда юриб, доимий босим остида ишлаётган мураббийлар ҳақида ўйлаганимда бундай истак унчалик кучли бўлмайди.
Аммо, ҳа, мен бу ҳақда ҳақиқатан ҳам ўйлайман. Ичимда ҳали ҳам нимадир бордек. Олов ҳали ҳам ёниб турибди", — деди Кин.
Ундан агар мураббийлик бўйича таклиф тушса, қандай қарор қабул қилиши сўралганда, Кин қисқача жавоб берди:
"Ким билади?"
Рой Кин аввал "Сандерленд" ва "Ипсвич" клубларида бош мураббий бўлиб ишлаган. Кейинчалик Ирландия терма жамоаси, "Астон Вилла" ва "Ноттингем Форест"да мураббий ёрдамчиси сифатида фаолият юритган.
