«Реал» президенти Флорентино Перес ва «Барселона» вакиллари "Қироллик клуби" раҳбарининг ўтган йил май ойида билдирган баёнотлари юзасидан каталонияликлар томонидан берилган туҳмат даъвоси доирасида яраштирув мажлисига чақирилди. Бу ҳақда Marca хабар берди.
Манбага кўра, учрашув 25 ноябрь куни Мадридда бўлиб ўтади. Унда «Барселона» Флорентино Переснинг баёнотларини рад этишини ва уларни қайтариб олишини талаб қилади. Мажлис якунлари мазкур низонинг кейинги жараёнини белгилаб беради.
Агар «Реал» президенти мажлисга келмаса ёки келган тақдирда ҳам ўз сўзларидан қайтишдан бош тортса, каталонияликлар Пересга нисбатан жиноий иш қўзғатишни сўраб ариза беришни режалаштирмоқда.
Перес май ойида Испания чемпиони бўлгани ҳақида гапирар экан, «Реал» етти марта чемпионликни қўлга киритганини, агар клубдан етти чемпионлик унвони «ўғирланмаганида», бу кўрсаткич 14 та бўлиши мумкинлигини айтган эди.
