Франция терма жамоаси бош мураббийи Зинедин Зидан Миллатлар лигаси гуруҳ босқичи 2-турида Бельгия устидан қозонилган 1:0 ҳисобидаги ғалабага муносабат билдирди.

Учрашувдаги ягона голни 88-дақиқада Майкл Олисе урди.

«Мен жуда мамнунман. Биз тўпга эгалик қилишда устунлик қилишни истаймиз ва бу жиҳатга алоҳида эътибор қаратдик. Жамоамизда сифат ҳам, ўзига бўлган ишонч ҳам жуда юқори. Футболчилар бунинг эвазига жуда кўп нарса беришмоқда. Улар нималарга қодир эканини кўрсатишди. Дебютантлар ҳам биринчи ўйинида ўзларини яхши намоён этишди. Мен хурсандман.

Менимча, бугун кечқурун кучли Бельгия терма жамоасига қарши жуда яхши ўйнадик. Биз жасоратли ҳаракат қилдик, рақиб майдонига ўтишдан қўрқмадик. Гарчи иккинчи бўлимда суръатни бироз пасайтирган бўлсак-да, ўйин давомида устунлик қилдик ва бу ғалабага тўлиқ лойиқ эдик», — дея Зиданнинг сўзларини УЕФА расмий сайти келтиради.

Франция терма жамоаси икки ўйиндан кейин 6 очко жамғариб, Миллатлар лигаси «А» дивизиони 1-гуруҳида пешқадамлик қилмоқда. 2 октябрь куни Франция ўз майдонида Италияни қабул қилади.