Хорватия терма жамоаси ярим ҳимоячиси Матео Ковачич Испанияни мағлуб этиш мумкин, деб ҳисобламоқда. Жамоалар 29 сентябрь куни Севильяда Миллатлар лигаси 2-тури доирасида ўзаро баҳс олиб боради.

«Биз улар жаҳон чемпионлари эканини ва 39 та ўйиндан бери мағлуб бўлмаётганини биламиз. Аммо бу ҳақда ўйлашни истамаймиз. Ўз ўйинимизга эътибор қаратишимиз, курашишимиз ва уларнинг асосий қуроли — тўпни ўзимизда ушлаб туриш имкониятини чеклашга ҳаракат қилишимиз керак. Биз ғалаба қозонишни истаймиз», — деди Ковачич матбуот анжуманида.

Ковачич Испания футболининг ҳозирги авлодига ҳам юқори баҳо берди.

«Аввал ҳам Испания ўйинларини томоша қилишни яхши кўрардим, у пайтда ҳам таркибда жуда кўп ажойиб футболчилар бор эди. Икки авлодни таққослаш қийин, аммо ҳар иккаласи ҳам жуда кучли.

Ҳозир менга айниқса Родри, Педри ва Ламин Ямалнинг ўйинини кузатиш ёқади».

Шу билан бирга, Ковачич хорватлар рақибдан қўрқмаслигини таъкидлади.

«Испания футболчилари ажойиб, аммо биз ҳеч кимдан қўрқмаймиз. Барча рақибларни, айниқса жаҳон чемпионларини ҳурмат қиламиз. Алоҳида футболчилардан ташқари, Испания жамоа сифатида ҳам жуда кучли.

Биз ҳиссиётга берилиб кетмаслигимиз керак. Ўз ўйинимизга эътибор қаратиб, курашишимиз лозим. Испанияни мағлуб этиш — бажарса бўладиган вазифа».

Хорватия турнирни Чехия устидан 2:1 ҳисобидаги ғалаба билан бошлади. Испания эса Англияни 3:2 ҳисобида мағлуб этди.