"Бунёдкор" футбол клубига яна бир трансфер тақиқи қўйилди.
Маълум қилинишича, клубга аввалроқ собиқ футболчи Ривалдо олдидаги қарздорлик сабаб FIFA томонидан трансфер тақиқи қўлланган эди. Ушбу чеклов қарз тўлиқ бартараф этилганидан кейингина бекор қилинади.
25 сентябрь куни эса ЎФА Футболчиларнинг мақоми ва ўтиши бўйича қўмитаси "Бунёдкор"га кетма-кет икки рўйхатдан ўтказиш даври мобайнида янги футболчиларни рўйхатга олишни тақиқлади. Бунга клубнинг собиқ футболчиси Самандаржон Мавлонқулов олдидаги қарзини белгиланган муддатда тўламагани сабаб бўлган.
Қайд этилишича, Ривалдо ва Мавлонқулов билан боғлиқ санкциялар бир-биридан алоҳида ҳисобланади. Ҳар икки иш бўйича мажбуриятлар тўлиқ бажарилганидан кейингина тегишли тақиқлар бекор қилинади.
Чеклов амал қилган даврда "Бунёдкор" нафақат янги профессионал футболчиларни Лига рўйхатидан ўтказа олмайди, балки академия тарбияланувчиларини ҳам MyLeague платформасига қўша олмайди.
Шу билан бирга, клуб тақиқ жорий этилгунга қадар рўйхатдан ўтказилган футболчилар билан шартномаларни узайтириши мумкин. Академиядан эса фақат чекловгача MyLeague платформасига киритилган футболчилар билан шартнома тузиб, уларни қайдномага қўшишга рухсат берилади.
