УЕФАнинг ҳаракатларидан сўнг ФИФА Флорида судига тақдим этган ҳужжатларнинг янги тафсилотлари маълум бўлди.
Август ойи охирида Европа футболи раҳбар органи Жаҳон чемпионати ҳуқуқларининг бир қисмини хусусий инвесторларга сотиш эҳтимоли билан боғлиқ ҳужжатларни ошкор қилишни сўрагани маълум бўлган эди. Бу ФИФА президенти Жанни Инфантинога нисбатан эҳтимолий «жиноий иш» бошланиши арафасида амалга оширилган.
Ўз жавобида Халқаро футбол федерацияси УЕФАнинг аризасида «ФИФА ва Жанни Инфантино ҳақида кўплаб ёлғон ёки чалғитувчи даъволар» борлигини таъкидлади.
«УЕФА жаноб Инфантино FFE дастури бўйича таклифдан шахсий манфаат кўришга уринганини ҳеч қандай асоссиз даъво қилмоқда. УЕФАнинг жаноб Инфантино бирор қонун ёки ахлоқий тамойилни бузгани ҳақидаги тахминлари мутлақо асоссиз», — дейилади ФИФА баёнотида.
