Қисқа вақт ичида А Сериянинг энг яхши марказий ҳимоячиларидан бирига айланган «Комо» футболчиси Хакобо Рамон «Реал» уни келажакда қайтариб олиш имконини берувчи махсус бандга эга экани ҳақида фикр билдирди.

21 ёшли испаниялик футболчи ҳозирча фақат «Комо»да муваффақият қозонишга эътибор қаратаётганини айтди. Шунингдек, у ўтган йили Мадриддан Италияга кўчиб ўтишини фаолиятидаги энг яхши қарор деб атади.

«Фақат битта нарсани аниқ айта оламан: мен «Комо»да жуда бахтлиман.

Мавсум эндигина бошланди ва мен бошқа ҳеч нарса ҳақида ўйламаяпман. Биз ажойиб мавсум ўтказишимиз керак, холос.

Бу қарор менинг фикрлаш тарзимни ўзгартирди. Мен доим Мадридда, ота-онам билан бирга яшаганман. Қулайлик зонамдан чиқишимга тўғри келди ва бу менга фойда берди. Мен улғайдим ва кундалик ҳаётимнинг айрим жиҳатларини ўзгартирдим. Ҳозир ўзимни жуда яхши ҳис қиляпман», — деди Рамон.

Хабарларга кўра, «Реал» Рамоннинг Италиядаги ривожланишидан мамнун ва келаси ёзда уни қайтариб олиш бандини фаоллаштиришни режалаштирмоқда.