Qisqa vaqt ichida A Seriyaning eng yaxshi markaziy himoyachilaridan biriga aylangan «Komo» futbolchisi Xakobo Ramon «Real» uni kelajakda qaytarib olish imkonini beruvchi maxsus bandga ega ekani haqida fikr bildirdi.

21 yoshli ispaniyalik futbolchi hozircha faqat «Komo»da muvaffaqiyat qozonishga e’tibor qaratayotganini aytdi. Shuningdek, u o‘tgan yili Madriddan Italiyaga ko‘chib o‘tishini faoliyatidagi eng yaxshi qaror deb atadi.

«Faqat bitta narsani aniq ayta olaman: men «Komo»da juda baxtliman.

Mavsum endigina boshlandi va men boshqa hech narsa haqida o‘ylamayapman. Biz ajoyib mavsum o‘tkazishimiz kerak, xolos.

Bu qaror mening fikrlash tarzimni o‘zgartirdi. Men doim Madridda, ota-onam bilan birga yashaganman. Qulaylik zonamdan chiqishimga to‘g‘ri keldi va bu menga foyda berdi. Men ulg‘aydim va kundalik hayotimning ayrim jihatlarini o‘zgartirdim. Hozir o‘zimni juda yaxshi his qilyapman», — dedi Ramon.

Xabarlarga ko‘ra, «Real» Ramonning Italiyadagi rivojlanishidan mamnun va kelasi yozda uni qaytarib olish bandini faollashtirishni rejalashtirmoqda.