«Барселона» президенти Жоан Лапорта «Атлетико» бош директори Мигель Анхель Хиль Марин билан ярашганини маълум қилди.

Улар ўртасидаги муносабатлар ёзда каталонияликларнинг ҳужумчи Хулиан Альваресга қизиқиш билдириши ортидан кескинлашган эди. Трансферлар ойнаси ёпилгач, «Барселона» футболчини ўз сафига қўшиб олиш ҳаракатларини тўхтатди.

«Биз кўришдик ва қучоқлашдик. Ишончим комилки, барча келишмовчиликларимизни ҳал қилиб бўлдик ва энди ҳаммаси очиқ. У ажойиб инсон, у билан мулоқот қилиш мен учун жуда қулай», — дея Лапортанинг сўзларини Barca Universal келтирди.

Европа футбол клублари ассоциацияси (EFC) Бош ассамблеяси ўтаётган Копенгагенда Лапорта, шунингдек, УЕФА президенти Александер Чеферин ва EFC раҳбари Носир Ал-Хелайфий билан ҳам учрашди.

Бу «Барселона» ташкилотга тўлиқ ҳуқуқли аъзо сифатида қайтганидан кейин Лапортанинг ассамблеядаги илк иштироки бўлди.