«Интер» ҳимоячиси Жон Стоунс Англия терма жамоаси билан ЖЧ-2026да иштирок этаётган пайтида Чешир полициясидан келган мактубни ўтказиб юборгани ортидан тезликни оширганлик учун жаримага тортилди. Бу ҳақда The Independent хабар берди.

32 ёшли футболчи тахминан 175 минг евро турадиган Range Rover автомобилини бошқариб кетаётганда, тезлик камераси уни соатига қарийб 49 километр ҳаракатланиш мумкин бўлган йўлда 69,2 км/соат тезликда қайд этган. Ҳодиса 8 май куни унинг Чеширдаги уйи яқинида содир бўлган.

Стоунс полициянинг биринчи мактубига жавоб бериб, автомобилни ўзи бошқарганини тан олган. Бироқ белгиланган жаримани тўлаш таклиф қилинган иккинчи мактубга жавоб қайтармаган. Натижада иш судга оширилган.

Суд футболчига 4 та жарима балли, тахминан 777,6 евро миқдорида жарима, 140 евро суд харажатлари ва 310,2 евро қўшимча йиғим белгилаган.

Стоунс Уоррингтон магистратлар судига йўллаган мактубида полиция хатига узоқ вақт уйда бўлмагани сабаб жавоб бера олмаганини тушунтирган.

«28 май куни маълумотларни тақдим этиш учун мактуб жўнатдим ва шундан кейин Англия терма жамоаси қароргоҳига кетдим. Биз у ерда 19 июлгача бўлдик. Кейин таътилга чиқдим ва Миланга кўчиб ўтдим. Шу сабабли бу хат тасодифан топилди — қарийб тўрт ой давомида уйда ҳеч ким бўлмаган», — дейилади футболчининг мактубида.

Стоунс ёзда «Манчестер Сити»дан «Интер»га ўтди. ЖЧ-2026да у олтита учрашувда майдонга тушди, аммо гол ёки голли узатма билан ажралиб турмади.