Дортмунднинг «Боруссия» ва Мюнхеннинг «Бавария» клублари собиқ ҳимоячиси Никлас Зюле Германия минтақавий лигаларидан бирида ўзини янги амплуада синаб кўрди.

Ёзда профессионал фаолиятини якунлаган 31 ёшли футболчи айни пайтда Германиянинг 9-дивизионида иштирок этадиган «Тифенбах» клуби шарафини ҳимоя қилмоқда.

Сўнгги ўйинларда жамоанинг асосий дарвозабони қўлини синдириб олгани сабаб Зюле унинг ўрнини эгаллашга мажбур бўлди. Интернетда тарқалган видеода собиқ ҳимоячининг дарвозабон сифатида ҳаракат қилаётганини кўриш мумкин. Ҳатто эпизодлардан бирида у устун билан тўқнашиб, дарвозани жойидан силжитиб юборган.

«Хельмштадт»га қарши дарвозабон сифатидаги дебют ўйинида Зюле бир нечта сейв амалга оширди, аммо жамоасини 1:2 ҳисобидаги мағлубиятдан қутқара олмади.

Кейинги учрашувда, «Эпфенбах»га қарши баҳсда ҳам у дарвозани қўриқлади ва «Тифенбах»нинг 3:2 ҳисобида ғалаба қозонишига ёрдам берди.

Эслатиб ўтамиз, Никлас Зюле Германиянинг беш карра чемпиони ҳисобланади.