Dortmundning «Borussiya» va Myunxenning «Bavariya» klublari sobiq himoyachisi Niklas Zyule Germaniya mintaqaviy ligalaridan birida o‘zini yangi ampluada sinab ko‘rdi.

Yozda professional faoliyatini yakunlagan 31 yoshli futbolchi ayni paytda Germaniyaning 9-divizionida ishtirok etadigan «Tifenbax» klubi sharafini himoya qilmoqda.

So‘nggi o‘yinlarda jamoaning asosiy darvozaboni qo‘lini sindirib olgani sabab Zyule uning o‘rnini egallashga majbur bo‘ldi. Internetda tarqalgan videoda sobiq himoyachining darvozabon sifatida harakat qilayotganini ko‘rish mumkin. Hatto epizodlardan birida u ustun bilan to‘qnashib, darvozani joyidan siljitib yuborgan.

«Xelmshtadt»ga qarshi darvozabon sifatidagi debyut o‘yinida Zyule bir nechta seyv amalga oshirdi, ammo jamoasini 1:2 hisobidagi mag‘lubiyatdan qutqara olmadi.

Keyingi uchrashuvda, «Epfenbax»ga qarshi bahsda ham u darvozani qo‘riqladi va «Tifenbax»ning 3:2 hisobida g‘alaba qozonishiga yordam berdi.

Eslatib o‘tamiz, Niklas Zyule Germaniyaning besh karra chempioni hisoblanadi.