Наманганнинг "Навбаҳор" ва Қирғизистон миллий терма жамоаси футболчиси Жоэль Кожо иштирокида йўл-транспорт ҳодисаси содир бўлди. Бу ҳақда Қирғизистон футбол иттифоқи расмий маълумот берди.
Ҳодиса 29 сентябрь куни рўй берган. Маълум қилинишича, Кожо миллий терма жамоа йиғини ўтаётган "Мурас Юнайтед" базасидан шахсий ишлари билан чиқиб кетган. Жибек Жолу ва Манас кўчалари кесишмасида у электровелосипедда ҳаракатланаётган фуқаро билан тўқнашган.
Жабрланган шахс тиббий муассасага етказилган. Компьютер томографияси натижаларига кўра, унда жиддий жароҳат ёки мия чайқалиши аломатлари аниқланмаган.
Қирғизистон футбол иттифоқи баёнотида фуқаро йўлни пиёдалар ўтиш жойидан кесиб ўтаётгани, бироқ йўл ҳаракати қоидаларини бузгани қайд этилган. Шу билан бирга, ЙТҲнинг аниқ сабаблари ва барча ҳолатлари тегишли текширув якунлари бўйича маълум бўлиши таъкидланган.
Айни пайтда Жоэль Кожо миллий терма жамоа ихтиёрида бўлиб, Ливанга қарши бўлажак учрашувга тайёргарлик кўрмоқда.
