Португалия терма жамоаси ҳимоячиси Рубен Диаш Миллатлар лигасида Норвегия устидан 2:1 ҳисобида қозонилган ғалабадан кейин Криштиану Роналду атрофидаги вазиятга муносабат билдирди.

Роналду бутун учрашувни захира ўриндиғида ўтказди ва майдонни тарк этаётганда мухлислар билан саломлашмади. Шунингдек, 41 ёшли ҳужумчи икки машғулотни ўтказиб юборгани ҳақида хабарлар тарқалди. Бош мураббий Жорже Жезуш Роналдуни майдонга туширмаганини фақат тактик сабаблар билан изоҳлади.

«Ростини айтсам, ўзим, Бернарду Силва ва Бруну Фернандеш номидан гапирадиган бўлсам, бу масалага ҳеч ким ОАВчалик катта аҳамият бермаяпти.

Бундай ҳолатлар ҳаммада бўлади. Менга ҳеч қачон мураббийи билан муаммоси, қийин вазияти ёки келишмовчилиги бўлмаган битта футболчини айтиб беринг. Булар табиий ҳолатлар. Энг муҳими — вазиятга тўғри баҳо бериб, олдинга ҳаракат қилиш», — дея Диашнинг сўзларини Goal келтирди.

Футболчи Роналдунинг асабийлашиши ҳам қисқа муддатли бўлганини таъкидлади.

«Бу 10, 15 ёки 20 сония давом этадиган асабийлик холос. Бу унинг 20 йилдан ортиқ вақт давомида миллий терма жамоага бўлган садоқатини ҳеч қандай камайтирмайди. Бир лаҳзада асабийлашасан, беш дақиқадан кейин эса ҳаммамиз терма жамоанинг муҳим ғалабасини биргаликда нишонлаяпмиз», — деди Диаш.

Аввалроқ Роналду ва Жезуш вазиятни муҳокама қилиш учун Португалия футбол федерацияси президенти Педру Проэнса билан учрашган эди.