Таниқли журналист ва Криштиану Роналдунинг яқин дўсти Эду Агирре 41 ёшли футболчининг Португалия терма жамоасидан кетиши тафсилотларини маълум қилди.

"Ан-Наср" ҳужумчиси бош мураббий Жорже Жезуш билан келишмовчиликлар сабаб Португалия терма жамоаси қароргоҳини ўзбошимчалик билан тарк этган. Маҳаллий ОАВ хабарларига кўра, Роналду терма жамоадан кетиш бўйича қатъий қарор қабул қилган.

"Роналду ва Португалия футбол федерацияси президенти иштирок этган ёпиқ учрашувда Жезуш Криштианудан аввалги ўйинда уни қиздириш машқларига чиқариб, кейин эса майдонга туширмагани учун узр сўради. Мураббий, шунингдек, матбуот анжуманида ўз хатосини очиқ тан олиб, бутун вазиятга ойдинлик киритишга ваъда берган.

Аммо у ваъдасини бажармади. Роналдунинг фикрича, Жезуш аксинча, ҳақиқатга тўғри келмайдиган гапларни айтди ва вазият назорат остида экани, Криштиану эса шунчаки футболчилардан бири эканини кўрсатишга уринди. Бу Роналдуни ғазаблантирди, у ўзини хиёнат қилингандай ҳис қилмоқда. Жорже шахсий суҳбатда ундан узр сўради, аммо омма олдида бутунлай бошқача гапирди. Шунинг учун Криштиану уйига кетишга қарор қилди. Унинг учун бу хиёнат эди", — дея Агирренинг El Chiringuito дастуридаги сўзларини Madrid Zone келтирди.

Бугун Португалия терма жамоаси Миллатлар лигаси доирасида Данияга қарши сафар учрашувини ўтказади.