Патрис Эвра Криштиану Роналдунинг Португалия терма жамоаси йиғинини тарк этгани ва Жорже Жезушнинг матбуот анжуманидаги фикрларига кескин муносабат билдирди.

Франциялик собиқ футболчининг таъкидлашича, Роналдуга оддий футболчи каби муносабатда бўлиш мумкин эмас, чунки унинг Португалия ва жаҳон футболи тарихидаги ўрни алоҳида.

"Бу вазиятга нафрат билан қараяпман. Биз қандайдир ёш футболчи ҳақида эмас, Криштиану Роналду ҳақида гапиряпмиз. Жорже Жезуш Португалия футболида катта номга айланишидан анча олдин Роналду аллақачон Роналду эди", — деди Эвра.

У, шунингдек, Португалия терма жамоасининг Роналду давридаги муваффақиятларини эслаб, футболчининг мамлакат футболи учун аҳамиятини алоҳида таъкидлади.

"Роналду ўзи билан тарихни олиб юради. Бу Португалия футболи тарихи, жаҳон футболи тарихи. Уни захирада қолдириш ва оддий футболчидек муносабат қилиш мен учун ҳақоратдек кўринади", — дея қўшимча қилди у.

Эвра Аргентинада Лионель Месси, Бразилияда Неймар ва Англияда Харри Кейнга кўрсатиладиган ҳурматни мисол қилиб, Португалия ҳам Роналдунинг икки ўн йилликдан ортиқ хизматларини унутмаслиги кераклигини айтди.

Унинг фикрича, Криштиану фаолияти давомида кўп бор танқид қилинган ва "унинг даври тугади" деган гапларни эшитган, аммо ҳар сафар юқори савияда қайтишга муваффақ бўлган.