La Gazzetta dello Sport нашри маълумотига кўра, «Интер» «Кальяри»нинг 20 ёшли ярим ҳимоячиси Алессандро Романони Ҳоқон Чалханоглунинг эҳтимолий ўринбосари сифатида кўриб чиқмоқда. Романо яқинда Италия миллий терма жамоасида ҳам дебют қилди.

Туркиялик футболчининг «Интер» билан шартномаси мавсум якунида тугайди. 33 ёшли Чалханоглунинг сўнгги мавсумларда жароҳатлар билан тез-тез боғлиқ муаммоларга дуч келгани сабаб унинг клубда қолиши борасида ноаниқлик мавжуд.

Шунингдек, «Интер» жорий мавсумда етарлича ўйин амалиётига эга бўлмаётган Александр Станковични ҳам сотишни режалаштирмоқда. Шу боис келаси ёзда таянч ярим ҳимоячиси билан шартнома имзолаш клуб учун устувор вазифалардан бирига айланмоқда.

20 ёшли Романо бу ёзда «Рома»дан «Кальяри»га кейинчалик мажбурий сотиб олиш шарти билан ижара асосида ўтган. У жорий мавсум А Сериясининг энг ёрқин кашфиётларидан бирига айланиб бормоқда.

Романо «Кальяри»нинг чемпионатдаги барча бешта учрашувини асосий таркибда бошлади. Унинг юқори савиядаги ўйини Италия миллий терма жамоасига илк бор чақирилишига сабаб бўлди.

Ярим ҳимоячи ўтган ҳафта Миллатлар лигасида Бельгияга қарши ўйинда Италия термаси сафида дебют қилди. Кейинчалик Туркия устидан қозонилган ғалабали учрашувда ҳам захирадан майдонга тушди.