TyC Sports нашри маълумотига кўра, «Атлетико Мадрид» «Ривер Плейт»нинг иқтидорли дарвозабони Сантьяго Бельтранни Ян Облакнинг эҳтимолий вориси сифатида кўриб чиқмоқда.

Словениялик афсонавий дарвозабон учун бу мавсум «Атлетико»да сўнггиси бўлиши мумкинлиги ҳақидаги хабарлар фонида мадридликлар келаси ёзда Бельтранни ўз сафига қўшиб олишни режалаштирмоқда.

21 ёшли дарвозабон июнь ойида Аргентина терма жамоасида дебют қилган ва айни пайтда ҳам навбатдаги халқаро танаффус учун миллий жамоа қайдномасидан жой олган.

«Ривер Плейт» Бельтранни текин ёки жуда арзон нархда йўқотиб қўймаслик учун декабрь ойи охирида якунланадиган шартномасини узайтиришга ҳаракат қилмоқда.

Аргентиналик иқтидор жорий йилда академиянинг деярли номаълум тарбияланувчисидан мамлакатнинг энг истиқболли футболчиларидан бирига айланди ва «Ривер Плейт»нинг асосий дарвозабони мақомини қўлга киритди.

Бельтран жамоа сафида 39 та учрашувда майдонга тушиб, шуларнинг 15 тасида дарвозасидан гол ўтказмаган. Унинг дарвозасига жами 34 та гол урилган.

Шунингдек, у Аргентина терма жамоасида Эмилиано Мартинеснинг узоқ муддатли вориси сифатида ҳам кўрилмоқда.