Tax Policy Associates ташкилотининг янги ҳисоботига кўра, «Манчестер Сити» собиқ бош мураббий Роберто Манчинига тўланган маблағлар бўйича солиқ тўлашдан қочган, деган даъволар сабаб 24 миллион фунтгача солиқ ва жарима тўлашга мажбур бўлиши мумкин.

Таҳлилда таъкидланишича, Абу-Дабидаги «Ал-Жазира» спорт ва маданият клуби билан маслаҳатчилик келишуви орқали ўтказилган 8,866 миллион фунт аслида Манчинининг «Манчестер Сити»даги иши учун тўланган ҳақ бўлган ва ушбу маблағ Британиядаги иш ҳақи тизими орқали расмийлаштирилиши лозим эди.

«Сохта келишув қандай шароитларда тузилгани юзасидан жиноий тергов бошлаш учун етарли асослар бордек кўринмоқда», — дейилади ҳисоботда. Шу билан бирга, ҳужжатда муайян шахсларнинг қонунбузарлик қилгани ҳақида даъво илгари сурилмаётгани ҳам алоҳида таъкидланган.

Ҳозирда Италия терма жамоаси бош мураббийи бўлиб ишлаётган Манчини эса бу вазиятга муносабат билдириб: «Айтилаётган икки томонлама шартнома менинг муаммом эмас», — деди.

«Манчестер Сити» эса ўз айбсизлигини таъкидлашда давом этмоқда. Клуб бош директори Ферран Сориано маблағлар клуб эгасидан келмаганини «қатъий равишда исботлайдиган далиллар» борлигини билдирган.

Бундан ташқари, клуб раиси Халдун Ал-Муборак Буюк Британияда дипломатик дахлсизликка эга. Бу ҳолат эҳтимолий ҳуқуқий жараёнларни янада мураккаблаштириши мумкин.