Килиан Мбаппе Франция терма жамоаси қароргоҳида олган жароҳатидан тикланаётган эди. Юлдуз футболчи Париждаги тунги клублардан бирида севгилиси билан бирга кўриниб қолди.
Аввалроқ матбуотда «Реал» Мбаппега ватанида дам олишга рухсат бергани ҳақида хабарлар тарқалган эди. Бунга сабаб футболчига айни пайтда тинчлик ва дам олиш кераклиги, унинг клуб базасида бўлиши эса шарт эмаслиги билан изоҳланган.
Шунга қарамай, Мбаппе танқидларга дуч келди. Мухлислар ва журналистлар франциялик футболчининг профессионаллиги масаласини яна кун тартибига олиб чиқди.
Marca журналисти Давид Санчес Мбаппени танқид қилганлардан бири бўлди. Унинг фикрича, Килиан «Реал» базасига қайтиб, тикланиш дастури бўйича ишлаганида мухлисларнинг ҳурматини қозониши мумкин эди. Бироқ ҳужумчи кўнгилочар масканларда илк бор кўринаётгани йўқ ва бу унинг имижига салбий таъсир қилмоқда.
Cope радиосида чиқиш қилган Хуанма Кастаньо ҳам шу фикрни қўллаб-қувватлади. Унинг айтишича, Мбаппе «Реал»га қайтиб, мухлисларга клубга садоқатини кўрсатувчи муҳим ишора бериши керак эди.
«Реал» навбатдаги учрашувини 10 октябрь куни «Вильярреал»га қарши ўтказади.
