Италия терма жамоаси марказий ҳимоячиси Алессандро Бастони Миллатлар лигасида Францияга қарши сафарда 1:1 ҳисобида якунланган учрашувдан сўнг таассуротлари билан ўртоқлашди.

Айнан «Интер» футболчиси 68-дақиқада гол уриб, Италияга бир очко олиб келди.

«Ўйин оғир кечди, аммо бу биз учун янгилик эмасди — олдиндан нималар кутаётганини билардик. Жамоанинг ўйинидан жуда мамнунман. Биз охиригача курашдик, бор кучимизни бердик ва ғалабани нишонлашга тайёрланаётган французларнинг режасини буздик.

Албатта, яна гол урганимдан хурсандман, аммо голимдан кейин дарҳол қолган вақтда тўп ўтказиб юбормаслик муҳимлигини ўйладим. Бу ердаги дуранг — яхши натижа ва у бизга ишонч беради.

Ҳа, икки ўйинда кетма-кет гол уришимни кутмагандим, аммо ўзимга бўлган ишончни ҳеч қачон йўқотмаганман. Бир нечта омадсиз эпизод 300 дан ортиқ ўйиндан иборат фаолиятимни йўққа чиқара олмайди. Қўллаб-қувватлагани учун оиламдан миннатдорман», — деди Бастони RAI Sport телеканалига берган интервьюсида.

5 октябрь куни Италия ўз майдонида Туркияни қабул қилади.