Italiya terma jamoasi markaziy himoyachisi Alessandro Bastoni Millatlar ligasida Fransiyaga qarshi safarda 1:1 hisobida yakunlangan uchrashuvdan so‘ng taassurotlari bilan o‘rtoqlashdi.

Aynan «Inter» futbolchisi 68-daqiqada gol urib, Italiyaga bir ochko olib keldi.

«O‘yin og‘ir kechdi, ammo bu biz uchun yangilik emasdi — oldindan nimalar kutayotganini bilardik. Jamoaning o‘yinidan juda mamnunman. Biz oxirigacha kurashdik, bor kuchimizni berdik va g‘alabani nishonlashga tayyorlanayotgan fransuzlarning rejasini buzdik.

Albatta, yana gol urganimdan xursandman, ammo golimdan keyin darhol qolgan vaqtda to‘p o‘tkazib yubormaslik muhimligini o‘yladim. Bu yerdagi durang — yaxshi natija va u bizga ishonch beradi.

Ha, ikki o‘yinda ketma-ket gol urishimni kutmagandim, ammo o‘zimga bo‘lgan ishonchni hech qachon yo‘qotmaganman. Bir nechta omadsiz epizod 300 dan ortiq o‘yindan iborat faoliyatimni yo‘qqa chiqara olmaydi. Qo‘llab-quvvatlagani uchun oilamdan minnatdorman», — dedi Bastoni RAI Sport telekanaliga bergan intervyusida.

5 oktyabr kuni Italiya o‘z maydonida Turkiyani qabul qiladi.