"Милан"нинг собиқ ҳужумчиси Александр Пато Италия клуби Мадриднинг "Реал" жамоаси форварди Эндрикни ўз сафига қўшиб олишга урингани ҳақида гапирди.

"Мен Кардинале уни "Милан"га олиб келишга уринганини биламан, аммо бунинг уддасидан чиқа олмади. Бир неча кун олдин Копенгагенда бироз суҳбатлашдик. У "Милан" ҳақида жуда қайғуради ва клуб учун қўлидан келган барча ишни қилмоқда", — деди Пато La Gazzetta dello Sport нашрига берган интервьюсида.

Пато, шунингдек, Эндрик бошқа жамоага ўтиши керак, деб ҳисоблайди.

"Менимча, у ниманидир ўзгартириши керак. "Реал" таркибидан жой олиш унга осон бўлмаяпти. Унинг ўзи бу вазиятга қандай қарашини билмайман, аммо у қарорни ҳар доим агентларига қолдира олмайди. Менимча, унга бошқа клуб топиш керак".

Мавсумнинг дастлабки 8 та ўйинидан сўнг Эндрик "Реал" сафида бор-йўғи 4 дақиқа майдонда ҳаракат қилди.