Женнаро Гаттузо "Милан" сафидаги илк даврларини эслади. Унинг айтишича, жамоага келган пайтида тайёргарлик даражаси бошқа футболчиларникидан анча паст бўлган.
"Милан"да ўтказган вақтим мен учун орзуимнинг ушалиши бўлди. Жамоага энди келганимда даражам талабга жавоб бермасди. Тўпга қандай зарба берилаётганини эшитардим ва уларнинг зарбаси билан меники ўртасидаги фарқни ҳис қилардим.
Миланелло базасида клуб қўлга киритган совринлар акс этган суратларни кўрардим. Менинг мақсадим бир кун келиб ўша ерда ўз суратимни ҳам кўриш эди. Бу, ҳатто дастлабки йилларда ҳеч нарса ютмаган пайтларимизда ҳам, олдинга интилишим учун менга куч берарди.
Ўша чемпионлар ва ажойиб инсонлардан жуда миннатдорман", — дея Гаттузонинг сўзларини pianetamilan.it келтирди.
Эслатиб ўтамиз, Женнаро Гаттузо футболчи сифатида 1999 йилдан 2012 йилгача "Милан" шарафини ҳимоя қилган.
