Норвегия терма жамоаси бош мураббийи Столе Сольбаккен Миллатлар лигасида Португалиядан 1:2 ҳисобида қабул қилинган мағлубият ҳақида фикр билдирди.

"Менимча, йигитлар қўлидан келган барча ишни қилди. Кўплаб футболчиларимизнинг ўйинида ижобий жиҳатлар кўп бўлди. Португалия, эҳтимол, Европанинг энг кучли уч жамоасидан бири. Шунга қарамай, биз жуда яхши ўйнадик", — дея Сольбаккеннинг сўзларини VG келтирди.

Мураббий Норвегия биринчи голни ўтказиб юборган вазиятда хатога йўл қўйганини ҳам тан олди.

"Танаффус арафасида аутдан тўп ўйинга киритилаётганда эътиборни йўқотиб қўйганимиз жуда аламли. Биз танаффусга психологик устунлик билан чиқиб кетишимиз мумкин эди".

Сольбаккен 67-дақиқада алмаштирилган Эрлинг Холанднинг ўйинига ҳам баҳо берди.

"Биз у ўзини давом эттира олмайдиган даражада ҳис қилгунига қадар майдонда қолишига келишиб олган эдик. Тахминан 60 дақиқадан кўпроқ ўйнаши ҳақида гаплашганмиз. Менимча, у жуда яхши ўйин ўтказди. У рақиб ҳимоячиларини доимий босим остида ушлаб турди".

"Умуман олганда, бу йиғин қандай ўтганидан жуда мамнунман. Лекин натижалар ҳам муҳим эканини жуда яхши тушунаман. Учта кетма-кет мағлубият — бу яхши кўрсаткич эмас".

Норвегия терма жамоаси уч очко билан ўз гуруҳида сўнгги ўринни эгаллаб турибди. Уэльс ҳам худди шунча очко жамғарган.