"Бавария" ва Франция терма жамоасининг собиқ ҳужумчиси Франк Рибери 2013 йилда "Олтин тўп"ни қўлга киритишга лойиқ бўлганига ишонч билдирди.
Ўша йили франциялик футболчи овоз бериш натижаларига кўра Лионель Месси ва совринни фаолиятида иккинчи бор қўлга киритган Криштиану Роналдудан кейин учинчи ўринни эгаллаган эди.
"Ўша йил мен учун олтин йил бўлган. Мен Бундеслига ва Европанинг энг яхши футболчиси деб топилдим. "Олтин тўп"га лойиқ эдим. Уни қўлга кирита олмаганим мен учун оғриқли бўлди ва қаттиқ хафа қилган. Буни тан олишдан қўрқмайман", — дея Риберининг сўзларини La Gazzetta dello Sport келтирди.
Рибери 2022 йилда профессионал футболчилик фаолиятини якунлаган. Унинг сўнгги клуби Италиянинг "Салернитана" жамоаси бўлган.
Шунингдек, франциялик футболчи фаолияти давомида "Фиорентина", "Бавария", "Марсель", "Галатасарой", "Мец" ва "Брест" клублари шарафини ҳимоя қилган.
