Англия Премьер-лигаси клублари мустақил комиссиянинг молиявий қоидаларни бузиш бўйича иш юзасидан чиқарган қарорига «Манчестер Сити»нинг апелляцияси рад этилган тақдирда, клуб келаси мавсумда чемпионатда иштирок этмаслиги мумкин деб ҳисобламоқда. Бу ҳақда Sky Sports хабар берди.
«Манчестер Сити»нинг рақиблари клубга очколардан маҳрум қилиш кўринишидаги жазо, агар жамоага АПЛдан ташқарида фақат бир мавсум ўтказиш имконини берса, етарли бўлмайди деб ҳисобламоқда.
Манбага кўра, лиганинг бошқа клублари жазо комиссия қарорига кўра тўққиз мавсум давомида содир этилган қоидабузарликлар кўламига мос бўлиши керак, деган фикрда. Шунингдек, клублар кўп йиллик тергов жараёнининг АПЛ обрўси ва имижига таъсиридан ҳам хавотирда.
«Манчестер Сити» АПЛнинг жиддий молиявий қоидалари бузилиши билан боғлиқ барча айбловлар бўйича айбдор деб топилган. Клуб эса қоидабузарликларни инкор этмоқда ва комиссия қарори устидан аллақачон апелляция берган.
Агар апелляция рад этилса, кейинги босқичда жазо чораларини белгилаш масаласи кўриб чиқилади. Комиссия турли санкцияларни, жумладан жарима, очколарни олиб ташлаш ва бошқа спорт жазоларини қўллаши мумкин.
