Телебошловчи Пирс Морган Португалия терма жамоаси ҳужумчиси Криштиану Роналдунинг бош мураббий Жорже Жезуш бошчилигидаги мураббийлар штаби билан юзага келган можароси ҳақида фикр билдирди.
«Гап пул, машҳурлик ёки бошқа шунга ўхшаш нарсаларда эмас. Унга терма жамоада қандай фойдаланилиши борасида мутлақ кафолат берилган. Бу уни терма жамоадаги фаолиятини якунламасликка қарор қилишининг сабабларидан бири бўлди.
Янги мутахассис Жорже Жезуш — у билан Саудия Арабистонида бирга ишлаган — унга Миллатлар лигасидаги режасини тушунтирди. Улар Роналду дастлабки икки учрашувда ўйнаши, кейинги икки баҳсни эса ўтказиб юборишига келишиб олишди.
Биринчи ўйин олдидан унга: “Сен 90 дақиқа ўйнайсан”, дейишди. Бу мураббий ва Криштиану Роналду ўртасидаги тўғридан-тўғри суҳбат эди. Бу инсоннинг мақомини ҳисобга олиш муҳим.
У 67-дақиқада алмаштирилди. Роналду бундан бироз норози бўлди. Кейин мураббий ундан узр сўради ва федерация раҳбари олдида ҳам кечирим сўраб, бундай ҳолат такрорланмаслигини тушунтиришини айтди.
Аммо кейин у мутлақо тескари йўл тутди — “тен Хаг усули”ни такрорлади. У матбуот олдига чиқиб, Роналдунинг қадрини туширишга, уни ўз ўрнига қўйишга ҳаракат қилди. “Мен учун барча футболчилар тенг”, деган ва шу каби гапларни айтди. Бу эса Роналдунинг ғазабини янада оширди.
Кейин у Роналдунинг олдига келиб: “Қара, иккинчи блокда дам олишга келишганимизни биламан, лекин Норвегияга қарши ўйинда менга сен 30 дақиқа кераксан”, деди. Роналду эса: “Хўп, керак бўлса, майдонга тушаман”, деб жавоб берди. Аслида, бу унинг ён беришидир, чунки уларнинг келишуви бошқача эди.
Шундан кейин у 25 дақиқа давомида қизишди ва захирада қолди. Яна ҳурматсизликка дуч келганини ҳис қилиб, жуда қаттиқ ғазабланди.
Албатта, Португалия бу ўйинларда ғалаба қозонганини айтиш мумкин. Улар ўтган мавсумда Миллатлар лигасида ғолиб бўлишди. Ҳал қилувчи ўйинда ким ўзини кўрсатди? Криштиану Роналду. Шунинг учун “Роналдусиз терма жамоа яхшироқ” деб айтиш керак эмас.
У учун бу ҳурмат масаласи. Унга бир нарса ваъда қилишади, амалда эса бошқача йўл тутишади: унга машғулотни бошлашни кўрсатма беришади, аммо майдонга туширишмайди. Роналду буни жуда катта ҳурматсизлик деб ҳисоблаган.
Охир-оқибат у “бор-е” дегандек муносабат билдириб, самолётга ўтирди ва жамоа қароргоҳини тарк этди. Унинг асосий эътирози шундаки, бу мураббий матбуот олдига чиқиб, шахсий суҳбатларда айтган гапларига зид фикрларни билдиришда давом этган», — деди Морган Football Uncensored YouTube-каналидаги видеода.
Роналду Данияга қарши Миллатлар лигаси 3-тур учрашуви олдидан Португалия терма жамоаси қароргоҳини тарк этди. Дания мазкур баҳсда Португалияни 4:2 ҳисобида мағлуб этди. Бунинг олдидан бош мураббий Жорже Жезуш Роналду билан ҳеч қандай можаро йўқлигини айтган эди.
Айрим португалиялик ОАВлар Криштианунинг миллий терма жамоадаги фаолиятини якунлаш нияти борлиги ҳақида хабар тарқатди. Шунингдек, Жезуш ҳужумчи билан ярашув учрашувини ўтказишга рози бўлгани ва футболчини ноябрь ойидаги ўйинлар учун терма жамоа таркибига киритишни режалаштираётгани ҳақида ҳам маълумотлар пайдо бўлди.
