«Атлетико» клуби бош мураббий Диего Симеоненинг келажаги бўйича қарор қабул қилди. Аргентиналик мутахассиснинг амалдаги шартномаси 2026/2027 йилги мавсум охиригача мўлжалланган.

AS нашри маълумотига кўра, клуб ичида Симеонени жамоа бош мураббийи сифатида сақлаб қолиш ва у билан шартномани узайтириш керак, деган фикр устунлик қилмоқда. Ҳозирча расмий музокаралар бошланмаган бўлса-да, келишувга эришишда жиддий муаммолар бўлиши кутилмаяпти.

«Симеоне ишлашда давом этишни истайди. Клуб ҳам, умуман олганда, шу фикрда. Шунинг учун барча томонлар учун келишувга эришиш жиддий муаммо бўлмаслиги керак», — дейилади хабарда.

Диего Симеоне «Атлетико»ни 2011 йил декабридан буён бошқариб келмоқда. У жамоа бош мураббийи сифатида 800 дан ортиқ учрашув ўтказган.