Норвегия футбол ассоциацияси (NFF) ФИФАдан учта ҳолат бўйича текширув ўтказишни талаб қилди. Бу ҳақда ташкилот матбуот хизмати расмий сайтида маълум қилди.
Гап ФИФА Тинчлик мукофотини ташкил этиш жараёни, 2026 йилги жаҳон чемпионатида АҚШ терма жамоаси ҳужумчиси Фоларин Балогунга кўрсатилган қизил карточканинг бекор қилиниши ҳамда FIFA Forward Enterprise лойиҳаси ҳақида кетмоқда.
NFF ФИФАнинг Этика қўмитасига мурожаат қилиб, ташкилот президенти Жанни Инфантино ва ушбу жараёнларга алоқадор бошқа шахслар Этика кодексини бузган-бузмаганини текширишни сўради. Шунингдек, қарор қабул қилиш жараёнлари, назорат тизими ва ФИФАнинг ички назорат механизмлари қай даражада тўғри ишлаганига баҳо бериш талаб қилинмоқда.
NFF раҳбари Лизе Клавенесс ассоциация текширув қандай хулоса билан якунланиши кераклигини белгилаб бермаётганини таъкидлади. Унинг сўзларига кўра, асосий мақсад фактларни аниқлаш ҳамда ФИФАнинг бошқарув ва назорат механизмлари фаолиятига холис баҳо беришдан иборат.
Шунингдек, NFF ФИФАга аъзо ассоциацияларга ушбу ишлар бўйича барча зарур ҳужжатларни тақдим этишни талаб қилмоқда.
FIFA Forward Enterprise лойиҳаси ФИФАнинг эркаклар ва аёллар ўртасидаги асосий мусобақаларини бошқариш учун алоҳида компания ташкил этишни назарда тутган. Ҳисоб-китобларга кўра, ушбу лойиҳа 4,2 миллиард доллар даромад келтириши ва ФИФАга аъзо ассоциацияларнинг тушумларини ошириши мумкин эди. Бироқ ташаббус футбол федерациялари ва функционерлар томонидан кенг танқидга учради.
Балогун билан боғлиқ ҳолатга келсак, АҚШ терма жамоаси ҳужумчиси 2026 йилги жаҳон чемпионатининг 1/16 финалида Босния ва Герцеговинага қарши учрашувда ҳимоячи Тарик Муҳаремовичга нисбатан қоидабузарлик қилгани учун қизил карточка олган эди.
5 июль куни ФИФА Интизом қўмитаси Балогуннинг дисквалификациясини вақтинча тўхтатди. ОАВ маълумотларига кўра, бундай қарор АҚШ президенти Дональд Трамп ФИФА раҳбари Жанни Инфантинога қўнғироқ қилиб, футболчига берилган жазони қайта кўриб чиқишни сўраганидан кейин қабул қилинган.
