«Ковентри Сити» бош мураббийи Фрэнк Лэмпард «Манчестер Сити»нинг Англия Премьер-лигаси молиявий қоидаларини бузгани сабабли чемпионлик унвонларидан маҳрум этилиши эҳтимолига муносабат билдирди.

Англиялик мутахассиснинг фикрича, футболчиларнинг майдонда эришган ютуқларини уларнинг хотирасидан ўчириб бўлмайди.

«Менда чемпионлик унвонлари бор, аммо улар деворимга осиб қўйилмаган. Улар хотирамда сақланади.

Энг кучлиларга қарши майдонга тушиб, улар билан рақобатлашган аксарият футболчилар ғалаба қозониш учун улкан меҳнат қилишган.

Шунинг учун, менимча, футболчидан чемпионлик унвонини тортиб олиш жуда қийин бўлади.

Бундай ютуқлар чиройли шиша шкафда ёки бошқа жойда эмас, инсон хотирасида сақланиши керак», — дея Лэмпарднинг сўзларини келтиради The Athletic.

Фрэнк Лэмпард 2014/2015 йилги мавсумда «Манчестер Сити» шарафини ҳимоя қилган. У «Челси»ни тарк этганидан сўнг Манчестер клубида бир йил фаолият юритган.

«Манчестер Сити» 2009–2018 йиллар давомида молиявий қоидаларни бузганликда айбдор деб топилган.

Бироқ клубга нисбатан қўлланадиган якуний жазо ҳозирча белгиланмаган.