Франциянинг юқори дивизионида иштирок этаётган клублар мамлакат чемпионатининг трансляция ҳуқуқларига эга бўлган Ligue 1 Plus платформаси билан келишувни имкон қадар тезроқ бекор қилишни хоҳламоқда.

Бу ҳақда L’Équipe нашри хабар берди.

Ligue 1 Plus Франция профессионал футбол лигасига тегишли трансляция платформаси ҳисобланади.

У DAZN компанияси Лига 1 ўйинларини намойиш этиш бўйича беш йиллик шартномани имзолаганидан бир йил ўтиб, келишувни бекор қилганидан сўнг ишга туширилган.

Янги трансляция платформаси иккинчи мавсумдан буён фаолият юритмоқда. Бироқ унинг клубларга тўлаётган маблағлари ҳамон жуда камлигича қолмоқда.

Манба маълумотларига кўра, айнан шу ҳолат Франция футболидаги ҳозирги молиявий инқирознинг асосий омилига айланган.

Телетрансляция ҳуқуқлари учун янги тендер

Ноябрь ойида Франция чемпионати ўйинларини намойиш этиш ҳуқуқлари бўйича янги тендер бошланиши кутилмоқда.

Янги шартнома 2027/2028 йилги мавсумдан кучга кириши режалаштирилган.

Лига 1 учрашувларини трансляция қилишга Canal+, RMC Sport, Netflix ва Amazon Prime Video компаниялари қизиқиш билдириши мумкин.

Шунингдек, қонунчиликка киритиладиган ўзгариш янги тендернинг жозибадорлигини ошириши кутилмоқда.

Мазкур ўзгариш трансляция ҳуқуқларини ягона пакет сифатида сотиш имконини беради.