Эрон Про-лигасининг 8-туридан ўрин олган «Трактор» ва «Истиқлол» ўртасидаги учрашувда ғолиб аниқланмади.
8 октябрь куни Табриздаги «Ёдгор-е Имом» стадионида бўлиб ўтган баҳс 1:1 ҳисобида якунланди.
Меҳмонлар 28-дақиқада Саид Саҳархизоннинг голидан кейин ҳисобда олдинга чиқди. «Трактор» эса 74-дақиқада Саид Маҳди Ҳусайнийнинг аниқ зарбаси эвазига мувозанатни тиклади.
Учрашувда «Истиқлол» сафида ҳаракат қилаётган Ўзбекистон миллий терма жамоаси ҳимоячиси Рустам Ашурматов асосий таркибда майдонга тушиб, баҳсни тўлиқ ўтказди.
Жамоанинг яна бир ўзбекистонлик футболчиси Жалолиддин Машарипов эса 66-дақиқада захирадан ўйинга қўшилди.
«Трактор» ярим ҳимоячиси Одил Ҳамробеков мазкур учрашувда иштирок этмади. Унга миллий терма жамоа сафидаги ўйинлардан кейин дам олиш имконияти берилган.
