«Сантос» ҳужумчиси Неймар Бразилия А Сериясининг 29-турида «Фламенго»га қарши ўтказилган учрашувга баҳо берди.

34 ёшли футболчи ҳар икки жамоанинг ўйинини юқори баҳолаб, уларни айни пайтда Бразилиянинг энг кучли клублари деб ҳисоблашини таъкидлади.

«Бу футбол томоша қилишни яхши кўрадиганлар учун ажойиб ўйин бўлди. Иккала жамоа ҳам учрашув давомида тинимсиз ҳужум қилди.

Менимча, ҳозирги кунда Бразилиядаги энг яхши икки жамоа айнан шулар», — дея Неймарнинг сўзларини келтиради Planeta do Futebol.

Эслатиб ўтамиз, «Сантос» ва «Фламенго» ўртасидаги учрашув 2:2 ҳисобидаги дуранг билан якунланди.

Неймар мазкур баҳсда иккита пенальтини аниқ амалга ошириб, дубль қайд этди ва жамоасини мағлубиятдан қутқарди.

Ушбу натижадан сўнг «Сантос»нинг Бразилия чемпионатидаги мағлубиятсиз серияси кетма-кет саккизта ўйинга етди.

Жамоа 42 очко билан турнир жадвалида саккизинчи ўринни мустаҳкамлади.

«Фламенго» эса 61 очко жамғарган ҳолда чемпионатда пешқадамлик қилмоқда.