Испаниялик журналист ва телебошловчи Хосеп Педрероль Мадриднинг "Реал" клуби ҳужумчиси Килиан Мбаппе ўз ишига бўлган муносабати сабабли жамоа мухлисларининг ишонч ва муҳаббатини йўқотиш хавфи остида эканини таъкидлади.
Эслатиб ўтамиз, Мбаппе Миллатлар лигаси доирасида Туркияга қарши ўтказилган ва 0:1 ҳисобида якунланган учрашувда жароҳат олганидан кейин дастлаб Париждаги тунги клублардан бирида кўриниш берган. Кейинчалик эса велосипед миниб юргани акс этган видеони эълон қилган.
Педрероль El Chiringuito дастурида франциялик ҳужумчининг "Реал"даги фаолияти ва мухлислар билан муносабати ҳақида фикр билдирди.
"Мбаппе ажойиб футболчи. "Реал" уни жуда узоқ — етти йил кутди. Флорентино Перес уни жамоага олиб келиш учун кўп иш қилди.
Мухлислар унинг "Реал"га ўтиш борасида бир сафар "ҳа", бошқа сафар "йўқ" деганларини ҳам кечиришди.
У келганидан буён икки йил ичида клуб ҳеч қандай соврин ютмади. "ПСЖ" эса шу вақт давомида барча совринларни қўлга киритди. Табиийки, бу ҳолат футболчининг обрўсига салбий таъсир қилади.
У "Олтин тўп"ни қўлга киритишни хоҳлайди. Буни исташи яхши-ку, шундай эмасми?
Аммо "Реал" ундан кўпроқ нарса кутмоқда. Клуб Мбаппе ўзини жамоанинг ажралмас қисми деб билишини, клуб учун меҳнат қилишини ва уни юракдан ҳис этишини истайди.
Уни ҳақиқатан ҳам машғулотларда меҳнат қилаётган ҳолда кўришни хоҳлашади. У майдон ташқарисидаги воқеалар эмас, айнан майдонда содир бўлаётган ишлар билан боғлиқ хабарлар қаҳрамони бўлиши керак.
Албатта, у бу ишларни ёмон ниятда қилаётган бўлмаса керак. Эҳтимол, вазиятни яхшилаб тушунтирса, ҳаммаси ойдинлашар.
Бироқ "Реал"нинг исталган мухлиси билан суҳбатлашсангиз, у бу ҳолатни тушунмайди.
Мбаппе мадридлик мухлисларнинг муҳаббатини йўқотмоқда. Албатта, агар у қачондир бу муҳаббатга сазовор бўлган бўлса.
Бу футболчи билан содир бўлиши мумкин бўлган энг ёмон ҳолат. Сен қанчалик кучли футболчи бўлма, ўз мухлисларинг сени яхши кўрмаса, бундан ёмони йўқ.
Менимча, Мбаппе нимани хоҳлаётгани ва қаерга эришмоқчи экани ҳақида жиддий ўйлаб кўриши керак.
У ҳақиқатан ҳам "Реал" мухлисларининг муҳаббатини қозонишни истайдими?
Ахир бу унинг орзуси эмасмиди? "Реал"га ўтиш орқали ўз орзусини амалга оширмаганмиди?
Энди у шу орзусини йўқотади. Мбаппе уни йўқотади", — деди Хосеп Педрероль El Chiringuito дастурида.
