"Ле Ман" бош мураббийи Патрик Видейра "ПСЖ"нинг ҳозирги савияси ҳақида фикр билдириб, Париж клуби кетма-кет учинчи марта УЕФА Чемпионлар лигасида ғолиб чиқиши мумкинлигини таъкидлади.
Шанба куни Франция Лига 1 мусобақасининг 6-туридан ўрин олган учрашувда парижликлар элита дивизиони дебютанти "Ле Ман"ни 3:1 ҳисобида мағлуб этди.
Учрашувдан сўнг Видейра рақиб жамоанинг имкониятлари ва бош мураббий Луис Энрикенинг фаолиятига юқори баҳо берди.
"ПСЖ"нинг таркиби ҳамон ниҳоятда кучли. Луис Энрике эса ғалабага чанқоқ мураббий. У ҳеч нарсани тасодифга қолдирмайди ва ҳар бир рақибга жиддий ёндашади. У ўз ишининг ҳақиқий устаси.
Ҳеч ким "ПСЖ" кетма-кет икки марта Чемпионлар лигасида ғолиб чиқишини кутмаган эди. Аммо энди, менимча, улар ушбу мусобақада учинчи марта кетма-кет чемпион бўлишга ҳам қодир. Мен уларга айнан шуни тилайман", — дея Видейранинг сўзларини келтиради Actu Foot.
Қайд этиш жоиз, "ПСЖ" Франция чемпионатининг дастлабки олтита турида 11 очко жамғариб, турнир жадвалида бешинчи ўринни эгаллаб турибди.
