Испаниялик таниқли журналист Рамон Альварес Мадриднинг «Реал» клуби ярим ҳимоясидаги асосий муаммолардан бирига эътибор қаратди.

Мутахассис Орельен Тчуамени ва Федерико Вальверденинг майдон марказидаги ўзаро ҳамкорлиги кутилган натижани бермаётганини таъкидлади.

Унинг фикрича, ҳар икки футболчи алоҳида ҳолда юқори савияга эга бўлса-да, биргаликда ҳаракат қилганда бир-бирининг имкониятларини тўлиқ очиб бера олмаяпти.

Шу сабабли Альварес Вальверденинг доимий равишда ўнг қанот ҳимоячиси позициясида ўйнашини «Реал» учун энг мақбул ечим деб ҳисобламоқда.

«Қаторasига иккинчи ўйин ҳам Орельен Тчуамени ва Феде Вальверде жуфтлиги майдон марказида кутилган самарани бермаётганини кўрсатди. Ҳар иккиси алоҳида кучли футболчи, аммо улар бир-бирини яхши тўлдирмаяпти.

Вальверде тезлиги, жисмоний имкониятлари ва ҳужумларга фаол қўшила олиши туфайли дунёнинг энг яхши ўнг қанот ҳимоячисига айланиши мумкин.

Унинг ҳимоянинг ўнг қанотига ўтказилиши ярим ҳимояда ижодкорроқ футболчи учун жой очиб беради», — деди Альварес.