Тошкентда 4 октябрь куни жаҳоннинг 21 мамлакатидан 150 нафар спортчи иштирок этаётган дзюдо бўйича Гран-при сериясидаги халқаро мусобақа старт олди. «Газета.uz»нинг ЎзАга асосланиб хабар беришича, биринчи кунга мусобақалар якунига кўра, Ўзбекистон терма жамоаси аъзолари учта олтин ва битта бронза медалини қўлга киритиб, умумжамоа ҳисобида биринчи ўринда боришмоқда.

Эркаклар ўртасидаги баҳсларда барча уч вазн тоифасидаги олтин медалларни ўзбек курашчилари қўлга киритишди. Жумладан, Ўзбекистон терма жамоаси ҳисобига биринчи олтинни Шарофиддин Лутфуллаев келтирди.

60 килограмм вазн тоифасида гиламга чиққан Лутфуллаев саралаш баҳсларида АҚШ вакили Арон Кунихиро ва мўғулистонлик Херлен Ганболдни мағлуб этган бўлса, финалда украиналик Геворг Геворгян устидан ғалаба қозонди.

66 килограмм вазн тоифасидаги баҳслар финалида Мирзоҳид Фармонов Мўғулистон вакили Батгерел Баттсетсегни таслим этди, 73 килограмм вазн тоифасидаги курашчилар баҳсида эса Мирали Шарипов Бразилиядан келган Алекс Помбо да Сиьлвадан устун келди.

Аёллар ўртасидаги баҳсларда эса 48 килограмм вазн тоифасидаги Нодирова Гулова бронза медали билан тақдирланди. Ўз вазн тоифаларида исроиллик Шира Ришони ва бельгиялик Илсе Хеулен олтин медаллар эгасига айланишди.

«Газета.uz» хабарига кўра, 4-6 октябрь кунлари давом этадиган ва соврин жамғармаси 100 минг долларга тенг бўлган мусобақада сайёранинг энг кучли дзюдочилари иштирок этмоқда. Унда Ўзбекистон номидан 28 нафар эркак ва 21 нафар аёл полвонлар иштирок этмоқда.