«Барселона» бош мураббийи Ханс-Дитер Флик жароҳатидан тикланиш жараёнини якунлаётган Френки Де Йонгни янги позицияда синаб кўрмоқда.

Журналист Санти Овальенинг хабар беришича, каталонияликларнинг сўнгги машғулотларида германиялик мутахассис 29 ёшли нидерландиялик ярим ҳимоячини марказий ҳимоячи сифатида синовдан ўтказган.

Де Йонг учун ушбу позиция мутлақо бегона эмас. У «Аякс»даги фаолияти давомида ҳам марказий ҳимояда ҳаракат қилган. Бироқ сўнгги йилларда футболчи бу позицияда камдан-кам майдонга тушган.

13 октябрь, сешанба куни «Барселона» УЕФА Чемпионлар лигаси доирасида сафарда «Галатасарой»га қарши баҳс олиб боради.

Кутилишича, Френки Де Йонг жамоанинг навбатдаги Ла Лига учрашувида қайдномага қайтади. Каталонияликлар 17 октябрь, шанба куни Испания чемпионати доирасида «Бетис» меҳмони бўлади.