Саудия Арабистонининг «Ал-Қодисия» клуби бош мураббийи Брендан Роджерс «Пахтакор»га қарши ўйин борасида ўз фикрлари билан ўртоқлашди.

«Жуда яхши ўйин бўлди. Учрашувнинг сўнгги дақиқаларида пенальтидан гол ўтказиб юборганимиздан хафамиз. Футболчилар майдонда бор кучларини сарфлашди ва юқори энергия билан ҳаракат қилишди. Айниқса, ўтган жума куни кечқурун ҳам ўйнаганимиз ва сафар билан боғлиқ чарчоқни ҳисобга олсак, уларнинг ҳаракати таҳсинга сазовор», — деди Роджерс.

«Кучли жамоага қарши ўйинда дуранг ҳам мақбул натижа ҳисобланади. Биз сўнгги дақиқаларгача ҳисобда олдинда эдик. Рақибда йўқотадиган нарса қолмагани учун улар олдинга агрессив тарзда ташланишди, кўплаб узатмаларни амалга оширишди ва кучли босим ўтказишди.

Айниқса, иккинчи бўлимда тўпни яхшироқ назорат қилишимиз ва ўйин суръатини бошқаришимиз мумкин эди. Шунга қарамай, икки учрашувдан кейин ҳисобимизда тўрт очко бор. Футболчилар бу тажрибадан сабоқ олишади», — дея Роджерснинг сўзларини келтирди ОФК расмий сайти.