Италиянинг «Рома» клуби бош мураббийи Жан Пьеро Гасперини португалиялик мутахассис Жозе Моуриньонинг Римга қайтиши ва уни маҳаллий мухлислар қандай кутиб олиши мумкинлиги ҳақида фикр билдирди.

14 октябрь куни УЕФА Чемпионлар лигаси доирасида «Рома» ўз майдонида Мадриднинг «Реал» клубини қабул қилади. Айни пайтда Испания жамоасини бошқараётган Моуриньо ушбу учрашув орқали собиқ клубига рақиб сифатида ташриф буюради.

Гасперини португалиялик мураббийнинг «Рома» тарихидаги ўрнини эътироф этиб, унинг римлик мухлислар томонидан илиқ кутиб олиниши табиий ҳолат эканини таъкидлади.

«Моуриньо мухлисларнинг эътирофига тўлиқ муносиб. Улар уни жуда қадрлашган. Шунинг учун у қандай кутиб олинса, бунга ҳақли равишда лойиқ.

Одамларга ўз ҳис-туйғуларини намоён этишни тақиқлаб бўлмайди. Бироқ якунда мухлислар фақат «Рома»ни қўллаб-қувватлашади», — дея Гасперинининг сўзларини келтиради УЕФА матбуот хизмати.

Маълумот учун, Жозе Моуриньо 2021–2024 йиллар давомида «Рома» бош мураббийи сифатида фаолият юритган.

Португалиялик мутахассис қўл остида римликлар УЕФА Конференциялар лигасида ғолиб чиққан ва Европа лигаси финалига қадар етиб борган.