«Барселона» ҳужумчиси Рафинья жароҳатидан тикланиш жараёнининг якуний босқичига яқинлашмоқда. Бразилиялик футболчи 15 октябрь куни жамоанинг умумий машғулотларига қайтиши кутилмоқда.

Бу ҳақда Diario Sport нашри хабар берди.

Рафинья халқаро танаффусдан буён сон соҳасидаги ноқулайлик сабаб майдонга туша олмаяпти. У сўнгги бир неча кун давомида индивидуал дастур асосида шуғулланиб келди.

Шу сабабли бразилиялик вингер «Барселона»нинг «Хетафе» ва «Галатасарой»га қарши учрашувларини ўтказиб юборди.

Манбанинг маълум қилишича, Рафинья 17 октябрь, шанба куни Испания Ла Лигаси доирасида «Бетис»га қарши бўлиб ўтадиган сафар учрашуви учун жамоа қайдномасига киритилишни истамоқда.

Бироқ бу борадаги якуний қарорни бош мураббий Ҳанс-Дитер Флик қабул қилади. Германиялик мутахассис футболчининг жисмоний ҳолатини баҳолаб, унинг майдонга қайтишга қанчалик тайёр эканини аниқлайди.

Шу билан бирга, Флик Рафиньяни майдонга қайтаришга шошилмаслиги ҳам мумкин.

Гап шундаки, «Барселона» келаси ҳафта Европа Чемпионлар лигасида «ПСЖ»га қарши муҳим учрашув ўтказади.

Мураббийлар штаби бразилиялик футболчининг жароҳати қайта безовта қилмаслиги учун уни тўлиқ тиклаб, Париж клубига қарши баҳсга тайёрлашни афзал кўриши мумкин.

Ҳозирча Рафиньянинг «Бетис»га қарши учрашувда иштирок этиши аниқ эмас.