Ўзбекистон Суперлигасининг 24-туридан ўрин олган "Навбаҳор" — "Пахтакор" учрашуви олдидан наманганликлар ярим ҳимоячиси Шоҳруҳбек Абдураҳмонов бўлажак баҳс ҳақидаги фикрлари билан ўртоқлашди.

27 ёшли футболчи икки жамоа ўртасидаги рақобат, учрашувнинг аҳамияти ва мухлисларнинг қўллаб-қувватлаши ҳақида гапирди.

"Бундай баҳслар футболчиларга ўзгача мотивация беради"

Абдураҳмоновнинг таъкидлашича, "Навбаҳор" ва "Пахтакор" ўртасидаги учрашувлар доимо принципиал аҳамият касб этиб келган.

"Навбаҳор" ва "Пахтакор" Суперлиганинг доимий иштирокчилари ҳамда совриндор жамоалари ҳисобланади. Шу боис, улар ўртасидаги рақобат ҳамиша кескин ва муросасиз кечган.

Ўйлайманки, бу сафарги учрашув ҳам бундан мустасно бўлмайди. Бундай баҳслар футболчиларга ўзгача мотивация беради. Биз ҳам майдонда барча имкониятларимизни ишга солишга ҳаракат қиламиз", — деди футболчи.

"Ҳар икки жамоанинг ўз мақсади бор"

Ярим ҳимоячи бўлажак баҳснинг турнир жадвали нуқтаи назаридан ҳам муҳим аҳамиятга эга эканини қайд этди.

"Жамоалар турнир жадвалининг юқори поғоналарида бормоқда. "Пахтакор" чемпионлик учун курашаётган бўлса, "Навбаҳор" мавсумни совриндорлар сафида якунлашни мақсад қилган.

Шу сабабли олдинда бизни қизиқарли ва томошабоп учрашув кутаётганига ишонаман. Биз майдонга ўзгача иштиёқ билан тушиб, ғалаба қозониш ва мухлисларимизга қувонч улашиш учун бор кучимизни сафарбар этамиз", — деди Абдураҳмонов.

Мухлисларга мурожаат

Шоҳруҳбек Абдураҳмонов муҳим учрашув олдидан наманганлик ишқибозларга ҳам мурожаат қилди.

"Мухлисларимиздан стадионга ташриф буюриб, жамоамизни муносиб қўллаб-қувватлашларини сўрайман. Уларнинг далдаси биз учун жуда муҳим. Ишқибозларимиз ғалабамизга мададкор бўлишларига ишонаман", — дея сўзини якунлади футболчи.

Эслатиб ўтамиз, "Навбаҳор" ва "Пахтакор" ўртасидаги Суперлига 24-тур учрашуви 17 октябрь куни Намангандаги "Марказий" стадионида бўлиб ўтади. Баҳс соат 19:00 да бошланади.