«Челси»нинг собиқ эгаси Роман Абрамович Лондон клубини бошқарган даврида ҳозирда Франциянинг иккинчи дивизионида иштирок этаётган «Нант»ни сотиб олиш имкониятини кўриб чиққан. Бу ҳақда 2007 йилдан 2022 йилгача «Челси»да дарвозабонлар мураббийи бўлиб ишлаган Кристоф Лоллишон Ouest-France нашрига берган интервьюсида маълум қилди.

Лоллишоннинг эслашича, Абрамович бир куни уни Кобхэмдаги машғулотлар базасида жойлашган ўз офисига таклиф қилган. Россиялик тадбиркор Англия Премьер-лигаси клуби учун ўзига хос «ферма клуби» вазифасини бажара оладиган жамоани қидираётган эди. Ҳозирда бу вазифани, маълум маънода, 2023 йилда BlueCo компанияси сотиб олганидан кейин «Страсбург» бажармоқда.

«У мендан: “Қани, “Нант” ҳақида гапириб бер-чи. Бу қандай клуб ўзи?” деб сўради», — дея эслайди Лоллишон.

Лоллишоннинг сўзларига кўра, Абрамович аниқ тузилмага ва шаклланган ўйин услубига эга клубга қизиққан. Бироқ ўша пайтда «Нант»да бу хусусиятлар мавжуд эмасдек кўринган.

«Мен бундай ўйин услубини таъминлай оладиган барча одамларни танирдим. Бу ҳақда унга айтдим. Абрамович эса: “Хавотир олма, улар учун самолётлар юборамиз”, деб жавоб берди.

Икки ойдан кейин у яна менга қўнғироқ қилиб: “Менимча, бу клуб биз амалга оширмоқчи бўлган режа учун жуда катта”, деди», — дея ҳикоя қилди Лоллишон.