Франция Лига 1 мусобақасининг 7-тури доирасида "Монако" сафарда "Лорьян"га қарши майдонга тушди. Учрашув мезбонларнинг 1:0 ҳисобидаги ғалабаси билан якунланди.
Баҳс тақдирини иккинчи бўлимда урилган ягона гол ҳал қилди. 61-дақиқада Ноа Кадиу пенальтини аниқ амалга ошириб, "Лорьян"га ғалаба келтирди.
Шу тариқа, монегасклар жорий мавсумда барча мусобақалар доирасидаги илк мағлубиятини қабул қилиб олишди.
Мазкур натижадан сўнг "Монако" 14 очко билан Франция чемпионати турнир жадвалида учинчи ўринга тушди.
Жамоа ўзи билан бир хил — 14 очкога эга бўлган "ПСЖ" ва "Лилль"дан қўшимча кўрсаткичлар бўйича ортда қолмоқда.
"Лорьян" эса ҳисобидаги очколар сонини 11 тага етказиб, мусобақа жадвалида еттинчи поғонадан жой олди.
Навбатдаги турда "Монако" 25 октябрь куни ўз майдонида "Лилль"ни қабул қилади. "Лорьян" эса шу куни сафарда "Анже"га қарши баҳс олиб боради.
Франция Лига 1. 7-тур.
"Лорьян" — "Монако" — 1:0
Гол: Ноа Кадиу (61, пенальти).
